ទិន្នន័យពាណិជ្ជកម្មគ្រាប់ស្វាយចន្ទីសកលបានបង្ហាញពីអតុល្យភាពដ៏សំខាន់មួយនៅក្នុងខ្សែច្រវាក់តម្លៃរបស់ឧស្សាហកម្មនេះ ដោយប្រទេសផលិតធំៗជាច្រើនបាននាំចេញគ្រាប់ស្វាយចន្ទីឆៅក្នុងបរិមាណយ៉ាងច្រើន ខណៈដែលប្រទេស និងមជ្ឈមណ្ឌលកែច្នៃមួយចំនួនតូចវិញ ទទួលបានចំណែកភាគច្រើននៃចំណូលពីការនាំចេញ។ នេះបើយោងតាមរបាយការណ៍

យោងតាមទិន្នន័យពាណិជ្ជកម្មក្នុងអំឡុងខែឧសភា ឆ្នាំ២០២៥ ដល់ខែឧសភា ឆ្នាំ២០២៦ ប្រទេសកូតឌីវ័រ (Côte d'Ivoire) នៅតែជាប្រទេសនាំចេញគ្រាប់ស្វាយចន្ទីឆៅធំបំផុតរបស់ពិភពលោក ដោយមានតម្លៃនាំចេញប្រមាណ ២,៤៦ ពាន់លានដុល្លារអាមេរិក ស្មើនឹង ៣៨,១% នៃពាណិជ្ជកម្មសកល។ កម្ពុជាជាប់ចំណាត់ថ្នាក់លេខ២ ជាមួយតម្លៃនាំចេញ ១,៦២ ពាន់លានដុល្លារ ស្មើនឹង ២៥,២% នៃទីផ្សារ ខណៈហ្គាណា (Ghana) ស្ថិតនៅលំដាប់ទី៣ ជាមួយទឹកប្រាក់ ៨២៩ លានដុល្លារ ឬស្មើនឹង ១២,៩%។

តួលេខទាំងនេះបញ្ជាក់ពីតួនាទីដ៏សំខាន់របស់ប្រទេសផលិតនៅទ្វីបអាហ្វ្រិក និងកម្ពុជា ក្នុងការផ្គត់ផ្គង់គ្រាប់ស្វាយចន្ទីឆៅទៅកាន់ទីផ្សារអន្តរជាតិ។ ទោះជាយ៉ាងណា រូបភាពខុសគ្នាមួយបានលេចចេញនៅពេលពិនិត្យមើលការនាំចេញគ្រាប់ស្វាយចន្ទីដែលបានកែច្នៃរួច (Shelled Cashew Nuts) ដែលជាផលិតផលសម្រេចសម្រាប់នាំចេញ និងមានតម្លៃខ្ពស់ជាងគ្រាប់ឆៅយ៉ាងច្រើន។

វៀតណាមកំពុងគ្រប់គ្រងទីផ្សារនេះយ៉ាងលេចធ្លោ។ ក្នុងអំឡុងពេលដូចគ្នា ប្រទេសនេះបាននាំចេញគ្រាប់ស្វាយចន្ទីកែច្នៃរួចក្នុងតម្លៃ ៤,៨១ ពាន់លានដុល្លារអាមេរិក ស្មើនឹងជិត ៨៣% នៃការនាំចេញសកល។ ខណៈកូតឌីវ័រ ដែលជាប្រទេសនាំចេញគ្រាប់ស្វាយចន្ទីកែច្នៃធំជាងគេលំដាប់ទី២ មានចំណែកទីផ្សារត្រឹមប្រមាណ ១២% ប៉ុណ្ណោះ។

ភាពផ្ទុយគ្នានេះបានឆ្លុះបញ្ចាំងពីនិន្នាការសំខាន់មួយនៅក្នុងឧស្សាហកម្មគ្រាប់ស្វាយចន្ទីពិភពលោក គឺការផលិតគ្រាប់ស្វាយចន្ទីឆៅភាគច្រើនប្រមូលផ្តុំនៅក្នុងទ្វីបអាហ្វ្រិក និងផ្នែកខ្លះនៃអាស៊ី ខណៈសកម្មភាពកែច្នៃ និងការបង្កើនតម្លៃបន្ថែម (Value Addition) ត្រូវបានប្រមូលផ្តុំយ៉ាងខ្លាំងនៅប្រទេសវៀតណាម។

អ្នកជំនាញក្នុងឧស្សាហកម្មបានកត់សម្គាល់ថា ការបែងចែកតម្លៃនៅទូទាំងខ្សែច្រវាក់ផ្គត់ផ្គង់នេះ មានឥទ្ធិពលយ៉ាងសំខាន់ចំពោះប្រទេសផលិត។ ប្រទេសដែលផ្អែកជាចម្បងលើការនាំចេញគ្រាប់ស្វាយចន្ទីឆៅ ជារឿយៗទទួលបានតែចំណែកតូចមួយនៃតម្លៃចុងក្រោយរបស់ផលិតផលប៉ុណ្ណោះ ខណៈប្រទេសដែលមានឧស្សាហកម្មកែច្នៃទ្រង់ទ្រាយធំ អាចទទួលបានប្រាក់ចំណេញខ្ពស់ជាង បង្កើតការងារកាន់តែច្រើន និងបង្កើនចំណូលពីការនាំចេញបានកាន់តែរឹងមាំ។

ទំនាក់ទំនងពាណិជ្ជកម្មរវាងកម្ពុជា និងវៀតណាម គឺជាឧទាហរណ៍ជាក់ស្តែងមួយនៃស្ថានភាពនេះ។ យោងតាមទិន្នន័យក្រៅផ្លូវការរបស់សមាគមស្វាយចន្ទីកម្ពុជា (CAC) កម្ពុជា បាននាំចេញគ្រាប់ស្វាយចន្ទីឆៅ (Raw Cashew Nuts - RCN) ប្រមាណ ៩៧០,០០០ តោន ទៅកាន់ប្រទេសវៀតណាម ក្នុងរយៈពេលប្រាំខែដំបូងនៃឆ្នាំ២០២៦។ បរិមាណដ៏ច្រើននេះ ត្រូវបានក្រុមហ៊ុនវៀតណាមយកទៅកែច្នៃ ហើយនាំចេញបន្តទៅកាន់ទីផ្សារពិភពលោក។

ការរកឃើញនេះបានបង្ហាញពីសារៈសំខាន់កាន់តែខ្លាំងនៃការអភិវឌ្ឍសមត្ថភាពកែច្នៃក្នុងស្រុក សម្រាប់ប្រទេសដែលជាអ្នកផលិត។ ខណៈរដ្ឋាភិបាលនានាកំពុងស្វែងរកវិធីបង្កើនចំណូលពីការនាំចេញ និងពង្រឹងខ្សែច្រវាក់តម្លៃកសិកម្ម ការវិនិយោគលើហេដ្ឋារចនាសម្ព័ន្ធកែច្នៃកំពុងត្រូវបានចាត់ទុកថាជាអាទិភាពយុទ្ធសាស្ត្រមួយដ៏សំខាន់។

អ្នកជំនាញបានបញ្ជាក់ថា មេរៀនសំខាន់ពីឧស្សាហកម្មគ្រាប់ស្វាយចន្ទីគឺច្បាស់លាស់៖ ក្នុងពាណិជ្ជកម្មសកល ឱកាសធំបំផុតមិនមែនស្ថិតនៅត្រឹមការដាំដុះដំណាំប៉ុណ្ណោះទេ ប៉ុន្តែស្ថិតនៅលើសមត្ថភាពក្នុងការបង្កើនតម្លៃបន្ថែមឱ្យផលិតផល មុនពេលវាឈានដល់អ្នកទិញអន្តរជាតិ។

ស្របពេលដែលតម្រូវការផលិតផលអាហារកែច្នៃកំពុងបន្តកើនឡើងនៅទូទាំងពិភពលោក សមត្ថភាពក្នុងការផ្លាស់ប្តូរពីការនាំចេញវត្ថុធាតុដើមឆៅ ទៅកាន់ការផលិតផលិតផលមានតម្លៃបន្ថែម អាចក្លាយជាកត្តាកំណត់ថា ប្រទេសណាខ្លះនឹងអាចទទួលបានចំណែកប្រាក់ចំណេញធំបំផុតពីទីផ្សារគ្រាប់ស្វាយចន្ទីពិភពលោកនាពេលអនាគត៕